ZPM thli tleh tur a awm tawh lo; ICU a awm mek ang an ni- Lalruatkima

by News Editor

Tualchhung News

ZORAM TODAY| 31st October, 2025: Vawiin khan Mizo National Front, 6-Serlui South Block Party Workers' Meet Buhchangphai Community Hall-a neih chu Lalruatkima, Treasurer, MNF GHQ chuan khuallian niin a hmanpui a. Bialtu MLA Lalrinsanga Ralte, Gen. Secy., MNF GHQ chu khualzahawm a ni.

He hunah hian Khuallian Lalruatkima chuan Serlui South Block huamchhunga khaw 12 aṭangin ZPM - 151, INC - 46, BJP - 2, HPC - 5 leh Neutral 50; chhungkaw 97, an vaiin voters 254 te chu MNF ah a lawmlut a; lawmluh zingah Rualremthanga, New Builum ZPM VC chu telin, Builum khuaah hian MNF VC thar piang dawn a ni.

Khuallian Lalruatkima chuan thu sawiin, "MNF Party chu hnam thuthlunga din kal zel, Mizorama political party lian ber leh mei mit lova la kal thei awmchhun kan ni a, MNF dintu leh ram leh hnam tana zalenna sualtute, MNF innghahna hnam thuthlung meichher chhitute zah chungin theihtawpin kan ram leh hnam tan i bei zel ang u, tiin workers kalkhawmte a fuih a.

"MNF chu nationalism meichher kengtu leh chawinungtu kan nih avangin MNF lakah ram mipuite thikthu pawh a chhe bik a, min beiseina pawh a sang a, kan hnathawh pawh a ṭha bik tur a ni," a ti.

Lalruatkima chuan, "ZPM Sorkarin ram an enkawl danah ram mipui lung a awi tawh lova. Chhiah an tipung nasa a, kawng siamna tur thlenga chhiah (cess) kan pe chung pawhin kan kawngpui a ṭhat phah chuang lova, Sorkarin ram mipuite leh kan ṭhalaite beisei an phak loh avangin enchhin an tum tawh lova, ZPM thli tleh tur a awm tawh lo," tih thu sawiin, "ZPM chu ICU a awm mek ang an ni a, an chatthla lo chauh tawh a ni. Kum hnih(2) lek an sorkar chhungin ram mipui kan beidawng em em a, kum 2028 MLA Inthlanpuiah ZPM tan beisei tur a awm tawhlo," a ti bawk.

MNF Treasurer Lalruatkima chuan, "Congress party ho chu 'tu Pawl nge i nih' tih zawh hmasak zel an ngai a, Delhi lama an thlunzawm ber leh an drip khaina pawh tho chhuak tur an awm rih lova, Mizoramah pawh 'Bhavan' khuang a ring thei meuh lova, beisei tur an awm rih lo," a ti a. Dampa Bial By-Election lo awm turah pawh party dangin MNF min um vek a, rorel lai ZPM an in set hlum bawk si a, Dampa bialah leh Mizoram Inthlanpui lo awm leh turah MNF bak tling tur leh sorkar tur an awm chuang lo, a ti bawk.

Khualzahawm Lalrinsanga Ralte, Bialtu MLA pawhin thusawiin, Serlui bial mipui te'n bial tan theihtawp a chhuahna an hmuhpui ṭhin avangin lawmthu a sawi a, bial enkawl zui tura an ring ngam leh thlan nawn leh a nih leh avangin lawmthu a sawi a. "MNF Sorkar lai leh opposition MLA ka nih hnuah pawh bial hmasawnna hmuh tur a lo awm ve ta nual mai hi lawmawm ka ti hle a. Bial mipuite thlawpna zarah Serlui bial hmasawn zelna turin theihtawpin hna ka thawk zel dawn a ni," a ti.